मनाचा गाभारा
मनाचा गाभारा | ठेवा सदा स्वच्छ |
नाही कोणी तुच्छ | ठेव ध्यानी ||
सडके शरीर | भंगून जाईल |
मनच खाईल | एकदिनी ||
मन हे मंदिर | पवित्र हे स्थळ |
नको त्यात मळ | ठेवू कधी ||
असो सदा तुझे | चांगले रे कर्म |
जिवनाचे मर्म | ओळखावे ||
नाही दुखवावे | नाही हिणवावे|
सदा हसवावे | इतरांना
चांगले चिंतन | असावे मनात |
नांव रे जनात | निघेल गा ||
एकदाच मिळे |जन्म मानवाचा |
गाभारा मनाचा || भगवंत ||
मनाच्या मंदिरी | देव वसतसे|
सदा भासतसे | मज देवा ||
सोड माझे माझे | कुणाचे ना कोणी |
ही मनधरणी | वरवर ||
एकटा येणार | एकटा जाणार |
काय रे नेणार | सोबतीला ||
माणुसकी भली | खरी ती श्रीमंती
नको रे भ्रमंती | कशापायी ||
मनाचिये द्वारी | उभा पांडुरंग ||
नित्य त्यांच्या संग | गोडी लागे ||
मनाच्या मंदिरी | विठ्ठला पुजते |
मागणं मागते | देवाठायी ||
मिनाक्षी पांडुरंग नागराळे
जिल्हा परिषद प्राथमिक शाळा कोकलगाव
ता.जि.वाशिम
No comments:
Post a Comment