चांगले आचार | चांगले विचार |
सुखाचा संसार | त्याचा चाले ||
समजून घेणे | कष्टांचे लिंपणे |
जरी काही उणे | संसारात ||
संसाररथाची | दोघे चाके दोन
घेती समजून | एकमेकां ||
रूसवे फुगवे | याला नाही स्थान |
आपुलकी मान| देत रहा||
सुखाचा संसार | प्रेमाची चादर |
वाढेल आदर | मनातूनी ||
एकमेका साथ | संकटात देई |
तीच ती विठाई | जणू माझी ||
सन्मान गे व्हावा | कधी आदराने |
निर्मळ मनाने | वागा नीट ||
मानवाचा जन्म | पुन्हा घेणे नाही |
देते मी ही ग्वाही | ठेवा ध्यानी ||
संशयकल्लोळ | नका देऊ थारा ||
संसार पसारा | आवरावा ||
अति महत्वाचा | विश्वास असावा |
संशय नसावी | संसारात ||
अमृताची गोडी | येतसे जीवनी |
ठेव जरा ध्यानी | मिनू म्हणे ||
मिनाक्षी पांडुरंग नागराळे
जिल्हा परिषद प्राथमिक शाळा कोकलगाव
ता.जि.वाशिम
No comments:
Post a Comment