नको अवर्षण | बा धाव विठ्ठला |
हात तुझे ढगा | लाव देवा ||
चिंतातूर बळी | आसुसले डोळे |
पिकू देत मळे | गरीबांचे ||
झोपडीत माझ्या | ये रे बा विठ्ठला |
उपाशी झोपला | बाळ माझा ||
नको पाहू अंत | बरस गा देवा |
सुखाचा तो मेवा | मिळेल गा ||
करपली पिकं | कर्ज होतं डोई |
जीव मग देई | कर्जापायी ||
डोईजड झाले | ऐक गा-हाणे ||
एकच मागणे | ठेव ध्यानी ||
जगाचा पोशिंदा | शेतकरी राजा |
भाजीपाला ताजा | मिळे जगी ||
पडू दे पाऊस | संपव परीक्षा |
बस झाली शिक्षा | आजवरी ||
तूच पाठीराखा | विनवणी तुम्हां |
असा काय गुन्हा | झाला माझा ||
मिनू म्हणे आता | पाड गा पाऊस |
मनाची हाऊस | पुरवावी ||
माझा बा विठ्ठला| मायाळू दयाळू |
नित्य रे ओवाळू| तूच दाता ||
कवयित्री
मिनाक्षी पांडुरंग नागराळे
ता.जि.वाशिम
No comments:
Post a Comment