काय आहे ना,...

 

कडिपत्ता

 

गुरूमहिमा (अभंग)

 

आले (कविता)

 

सोडू नये धीर

 *सोडू नये धीर(अभंग प्रकार)* १

सोडू नये धीर | कशाला फिकीर |

हिंमतीने कर | कामधंदा || १||

उगीचच चिंता | द्यावी हो सोडून ||

कंबर कसून | रहावे तू ||२||

जीवनात सदा | संकटे येतात |

निघून जातात | आले तसे ||३||

होवू नये कधी | हतबल, दुःखी |

वेळ ही सारखी | नसते रे || ४||

मेहनत खूप | करावी कसून |

जिद्द मनातून | असू द्यावी || ५||

चिकाटीने काम | सदा करायचे |

नाही हरायचे | जीवनात || ६||

अपेक्षांचे ओझे | कमी ठेवायचे |

सुखी रहायचे | जीवनात || ७ ||

संकटसमयी | सोडू नये धीर |

कशास अधीर | व्हायचे हो || ८||

सत्वपरिक्षा हो | असते जीवनी |

अश्रु का नयनी | येवू द्यावे || ९||

मिनू म्हणे सदा | सोडू नको धीर |

मन तू खंबीर | ठेव सदा || १०||

कवयित्री:- मिनाक्षी पांडुरंग नागराळे

जि.प.प्राथ.शाळा.कोकलगाव

ता.जि.वाशिम

गानकोकिळा लतादिदी ( अभंग क्र२)

 *गानकोकिळा लतादिदी(अभंग क्र.२)*

तू गानसम्राज्ञी | तू गानकोकिळा |

किती गोड गळा | लतादिदी ||१||

भारताची शान | तुझा अभिमान |

देशभक्ती गान | गायिले तू ||२||

नैसर्गिक दान | सुंदर ती भेट |

भारतास थेट | मिळाली तू ||३||

सर्वोत्कृष्ट दीदी | तूच गे गायिका |

सुरांची नायिका | लतादिदी ||४||

सुगम संगीत | खेळे पदरात |

कंठ संगितात | येत असे ||५||

पाचही भावंडे | गायनाचा छंद |

संगीतात धुंद | रात्रंदिन ||६||

दिनानाथ गुरु | वडील गायक |

संगिताचा नायक | ख्याती असे ||७||

भारतरत्न तू | संगिताचे राग |

आयुष्याचा त्याग | लतादिदी ||८||

नियतीचा डाव | हरपली मुर्ती ||

जगात गे किर्ती | पसरली ||९||

मिनु म्हणे आज |अर्पू श्रद्धांजली |

ही सुमनांजली | लतादिदी ||१०||

*मिनाक्षी पांडुरंग नागराळे*

*जि.प.प्राथ.शाळा.कोकलगाव*

*ता.जि.वाशिम.*

माझा बाळीराजा (अभंग क्र.४)

 माझा बळीराजा (अभंग क्र.४)

राबराब राबी | माझा बळीराजा ||

कोणती ही सजा | उपभोगी || १||

 हवालदिल रे | जगाचा पोशिंदा ||

नाही भाव कांदा | चिंतातूर || २||

शेतकरी राजा | पिकेना रे शेती ||

काळी काळी माती | माझी माय ||३||

अवर्षण यंदा | काडीमोल भाव ||

सांगा कुठं जाव | शेतकरी ||४||

महागाई खूप | बियाणे महाग|

कसा काढू राग | सांग गड्या ||५||

यंदा हो लगीन | थोरली ही पोरं |

लागला हो घोर | जिवा माझ्या ||६||

कसं उजवावं | का कर्ज फेडावं ||

कसं रे जगावं | कळेनाच ||७||

शासनाला जाग | कधी रे येईल ||

 निल रे होईल | कर्ज सारं ||८||

ऐक पांडुरंगा | बळीची रे हाक||

संसाराच चाक | फिरव गा ||९||

मिनू म्हणे आता | पिकू दे शिवार ||

उचल हा भार | पांडुरंगा ||१०||

मिनाक्षी पांडुरंग नागराळे

जि.प.प्राथ.शाळा.कोकलगाव

ता.जि.वाशिम