कृष्णाली (भावपूर्ण श्रद्धांजली)

 कृष्णाली (भावपूर्ण श्रद्धांजली)

कवयित्री-मिनाक्षी नागराळे वाशिम

जायचंच जर होतं तर बाळा

इतका जीव का लावलीस?

साधभोळा स्वभाव तुझा

घरातून हसत हसत गेलीस!

परतीच्या प्रवासात बाळा

किती सोसल्यास गं यातना

हळूहळू कशी सोसलीस तू

मंदावत गेल्या जरी चेतना...!!

बाबांची लाडकी परी तू

निस्वार्थी,भोळाभाबडा स्वभाव

आईच्या कुशीतलं पिल्लू तू

आता तुला कुठं कुठं शोधावं?

एका आईचं काळीज बघ

आजही तुला शोधतंय

कृष्णा कृष्णा करत

मन सर्वत्र भटकतय....!!

तुझ्या जिवाचं सोनं झालं

मन भावनेत कसं गुंतलय

तुझ्या आठवणीचे क्षण

मनामनामध्ये जपलय...

तू जरी शरीराने गेलीस निघून

आजही तुझा वास आहे

काळजाच्या खोल कप्प्याआड

दडलेला तुझा सहवास आहे..

आठवणीने तुझ्या कृष्णा

झाल्या ओल्या डोळ्यांच्या कडा

पुष्परूपाने दरवळत रहा अन्

पडो अंगणात प्राजक्ताचा सडा...!!

जड अंतःकरणाने भावपूर्ण श्रद्धांजली

कवयित्री

मिनाक्षी पांडुरंग नागराळे

जि.प.प्रा.शाळा.कोकलगाव

ता.जि.वाशिम.

स्वामी विवेकानंद (अभंग क्र.३८) १२/१/२०२३

 स्वामी विवेकानंद (अभंग क्र.३८)

तरुण तपस्वी | भारतीय पुत्र |

अध्यात्मिक सूत्र | जगा सांगे ||

विद्वान पंडित | योगराज योग |

आणि ज्ञानयोग | ग्रंथ रचे ||

अध्यात्मिक ज्ञान | जगी मिळविले |

विचार चांगले | नरेंद्रचे||

विवेकानंदाचे | विचार प्रभावी |

तरुण तपस्वी | जन्मा आले ||

 

बारा जानेवारी | जन्म त्यांचा झाला |

अध्यात्मिकतेला | जपलासे ||

प्राण्यावर दया | शिकवि बंधूता |

प्रेम सहाय्यता | करीतसे ||

 ज्ञान, धर्म, ऊर्जा | समाज संस्कृती |

 प्रेम शिकविती | जनलोका ||

हिंदुत्व संस्कृती | जपे मनातूनी |

मर्मते जीवनी | मानियले ||

मिनू म्हणे आता | एकच हो इच्छा||

हार्दिक शुभेच्छा |जयंतीच्या ||

कवयित्री

मिनाक्षी पांडुरंग नागराळे

जि.प.शाळा कोकलगाव

९७६७६६३२५७|

दिव्यांगाची सेवा (अभंग क्र.३६)

 *दिव्यांगाची सेवा*(अभंग क्र.36)

दिव्यांगाची सेवा | खरा सेवाभाव ||

समानता भाव | अंगीकारू ||१||

समता बंधुता | दिव्यांगास ठेवू |

माणुसकी दावू | दिव्यांगास ||२||

समता सप्ताह | तीन डिसेंबर |

नऊ डिसेंबर | राबवूया ||३||

यशस्वी दिव्यांग | मुलाखत घ्यावी |

प्रेरणा ही द्यावी | इतरांना ||४||

नानाविध स्पर्धा | करू आयोजन |

छान नियोजन | करू चला ||५||

दिव्यांग दिनाला | स्वागत घेऊया |

सन्मान करूया | दिव्यांगाचा ||६||

संकटावरी ते | मात करूनिया |

जिवन जगुनिया | दाखविती ||७||

ही जनजागृती | चला करूयात |

धरून हातात | हात ठेवू ||८||

प्रेम दिव्यांगाला | थोडे देऊनिया |

थोडासा विश्वास | वाढवूया ||९||

मिनू म्हणे आता | समतेन वागा |

ह्रदयात जागा | ठेवा थोडी ||१०||

कवयित्री

मिनाक्षी पांडुरंग नागराळे

जि.प.प्राथ.शाळा.कोकलगाव

ता.जि.वाशिम

चक्रधारी कृष्ण (अभंग क्र.३४)

 चक्रधारी कृष्ण (अभंग क्र.३४)

सावळा गे कृष्ण | हाती सुदर्शन|

चक्रधारी कृष्ण| कुणी म्हणे ||१||

सावळा गे हरी | रूप मनोहर

असा गिरीधर | कृष्णसखा || २||

बाललीला गोड | ब्रम्हांडनायक |

सृष्टीचा चालक | चक्रधारी ||३||

माखनचोर तो | त्याची राधा सखी |

दिसे पृथ्वी मुखी | बाळकृष्णा ||४||

दृष्टाचा संहार | कंसाचा तो काळ |

यशोदेचा बाळ ||चक्रधारी ||५||

मिरेचा तो सखा | राधेचा तो हरी |

तो कृष्ण मुरारी | गिरीधर ||६||

अधर्माशी धर्म | अर्जुनाचा सखा|

उभा पाठीराखा| सदाचिया|| ७||

देवकीनंदन| वासुदेव पिता ||

जगाचा तो दाता | चक्रधर|| ८||

राधेचा तो प्राण | राधे राधे श्याम |

करिते प्रणाम | मिनू म्हणे ||९||

कवयित्री

मिनाक्षी पांडुरंग नागराळे

जि.प.प्राथ.शाळा.कोकलगाव

ता.जि.वाशिम.

मायबाप सेवा(अभंग क्र.३७)

 मायबाप सेवा (अभंग क्र.३७)

मायबाप पूजा | मायबाप सेवा

मिळेल हो मेवा जिवनात

जगी थोर आहे | मायबाप झाडं |

ते आधारवड | जीवनाचे ||

आभाळाएवढी | असे त्याची माया |

पडुनिया पाया | धन्य व्हावे ||

जिवंतपणीच | सेवा करा खूप ||

वाटते अप्रुप | जनलोकां ||

चारधाम काशी | घरातच आहे |

उघडूनिया पाहे | नेत्र तुझे ||

मायबाप पूजा | कमी ना जिवनी |

मायच धरणी | ठेव ध्यानी ||

हा जन्म लाभला | कुणामुळे आज |

जिवनाचा साज | मायबाप ||

खरे देव घरी | मायबाप देव |

ना कशाचे भेव | जीवनात ||

नकोस दुखवू | कधी मायबापा |

बघतोय बाप्पा | ठेव ध्यानी ||

आजचे जीवन | हे क्षणभंगुर |

मायबाप दूर | जाता कळे ||

सेवा कर नित्य | मायबाप श्रेष्ठ |

नको मती भ्रष्ट | करू नये ||

मायबाप सेवा | खरा परमार्थ |

जिवनास अर्थ | येई त्यांच्या |

मिनू म्हणे आता | धन्य तोच आहे |

मायबाप आहे | जीवनात ||

मिनाक्षी पांडुरंग नागराळे

जि.प.प्राथमिक शाळा.कोकलगाव

ता.जि.वाशिम.

मो.९७६७६६३२५७

वर्धा येथे होणा-या ९६ व्या आखिल भारतीय साहित्य संमेलनातील कवी कट्ट्यावर वाशिमच्या मिनाक्षी नागराळे यांच्या कवितेची निवड....

 ९६ व्या आखिल भारतीय साहित्य संमेलन वर्धा येथे ३,४,५ फेब्रुवारी २०२३ रोजी आयोजित केलेल्या साहित्य संमेलनातील कवी कट्ट्यावर वाशिम येथील कवयित्री कु.मिनाक्षी पांडुरंग नागराळे यांच्या कवितेची निवड झाली आहे.आखिल भारतीय साहित्य संमेलनात दुस-यांदा त्यांच्या कवितेची निवड झाल्याने वाशिम साहित्य क्षेत्रात हा मानाचा तुरा रोवला आहे..पुर्वी ९२ व्या आखिल भारतीय साहित्य संमेलन यवतमाळ येथे कवयित्री मिनाक्षी पांडुरंग नागराळे यांच्या बाप या कवितेची निवड झाली होती...आता वर्धा येथे होणा-या ९६ व्या आखिल भारतीय साहित्य संमेलनातील कवी कट्ट्यावर ३/२/२०२३ रोजी दुपारी ३ ते ४ या वेळात मिनाक्षी नागराळे यांच्या करू अनांथांची सेवा या अभंगाची निवड झाली आहे.दुस-यांदा आखिल भारतीय साहित्य संमेलनात संधी मिळाल्याने वाशिम जिल्ह्याचे नाव रोशन केले आहे.त्यामुळे सर्व स्तरातून त्यांवर कौतुकाचा व अभिनंदनाचा वर्षाव होत आहे...्

नको आत्महत्या (अभंग क्र.३५)

 नको आत्महत्या (अभंग प्र.३५)

नको आत्महत्या | ना देह फुकाचा |

विचार मनाचा | ठेव ध्यानी || १||

हिंमतीने रहा | संयमाने वागा |

ह्रदयात जागा | कमवावी ||२||

अविचारी मना | भरकटू नका |

जिवनात चुका | होतातच ||३||

मनातली घाण | काढुनिया टाक |

मनाचाच धाक | असू द्यावा ||४||

कष्टाची भाकर | मेहनत कर | 

ओंजळ ती भर | सुखाचिया ||५||

पुन्हा नाही जन्म | अरे मानवाचा |

विचार देहाचा | करा आधी || ६||

आईचे ते कष्ट | सोसुनिया कळा |

जन्म देते बाळा | ठेव ध्यानी ||७||

पुनर्जन्म होई | कैकदा मातेचा |

विसर जिवाचा | पडला का || ८||

सुदैवाने लाभे | जन्म मानवाचा |

खेळ नशिबाचा | नव्हे काही ||९||

मिनू म्हणे आता | हिंमतीने जगा |

उगाचच त्रागा | कुणापायी ||१०||

कवयित्री

मिनाक्षी पांडुरंग नागराळे

जि.प.प्राथ.शाळा.कोकलगाव

ता.जि.वाशिम.