पांढरे कपडे | पुढारी ऐटीत |
हात फिरवीत | दाढीवर ||
राजकारणाचे | एकच ते वेड |
कोल्हा तो लबाड | जणू वाटे ||
आपल्याच ओढी | भाकरीला दाळ |
गरीबांचा काळ | वाईटच ||
मतदानासाठी | जोडतोया हात |
तो विश्वासघात | करतसे ||
पुढारी नसतो | गरीबांचा वाली |
खोटे हास्य गाली | त्यांच्या नित्य ||
ढेरीचा तो घेर | नित्य वाढतसे |
फुका बोलतसे | घळघळ ||
कागदावरच | सगळ्या योजना |
पैसाच पुरेना | तरीही हो ||
घरकुलं खाई | ती स्मशानभूमी |
अश्वासना हमी | सदा देई ||
बसून खातील | एवढं ओढीतो |
हात रे जोडितो | सदाचिया ||
मोहमाया सारी | जमवी पुढारी |
कसली लाचारी | असे देवा ||
मिनू म्हणे आता | जाणते पुढारी |
दाखवी हुशारी | लोकांचिया ||
कवयित्री
मिनाक्षी पांडुरंग नागराळे
जि प.प्रा.शाळा.कोकलगाव
ता.जि.वाशिम
